Më në fund e dimë sesi ta thërrasim princin e vogël të dukeshës Kate Middleton dhe princit William.
Pallati Kensington ka bërë njoftimin zyrtar në Instagram, ku zbulon se vogëlushi do të quhet Louis Arthur Charles.
“Duka dhe Dukesha e Kembrixhit janë të lumtur të shpallin se e kanë emëruar djalin e tyre Louis Arthur Charles. Foshnja do të njihet si Lartësia e Tij Mbretërore, Princi Louis i Kembrixh”.
Prej ditës së hënë, familjes mbretërore i është shtuar pjesëtari i ri, por ende nuk kishim një emër zyrtar. Princi William kishte bërë me dije se do të zgjidhnin një emër të fortë për djalin e dytë, dhe me sa duket kështu vepruan.
Emri iu vendos në nder të xhaxhait të Princit Charles, Lord Mountbatten (Louis Francis Albert Victor Nicholas Mountbatten), i cili u vra në vitin 1979, kur IRA (Ushtria Republikane Irlandeze) vendosi një bombë në varkën e tij të peshkimit.
Emri Arthur ishte një nga mundësitë më të përfolura sipas basteve. Më pak i favorizuar ishte emri Louis, ndaj dhe emri i sotëm është një surprizë e madhe për fansat e familjes mbretërore.
Princi William dhe Dukesha e Kembrixhit i prezantuan botës fëmijën e tyre të tretë, mëngjesin e së hënës rreth orës 11, në Spitalin St Mary në Londër. Vogëlushi peshonte 3.8 kilogramë.
