Orinda Huta ka dëshmuar se ka raport të shkëlqyer me familjen e Turjan Hyskos, si me nënën, po ashtu edhe me vëllanë e tij. Këtë gjë e ka vërtetuar sot vetë Eljo, i cili ka treguar se që kur Orinda ka hyrë në familjen e tyre kanë pasur një marrëdhënie shumë të mirë. Ai është shprehur në rubrikën “N’Fermë” në “E diell” se moderatorja e këngëtarja e njohur është shoqja më e mirë e atij dhe nënës së tij e Turit.
“Orinda që kur ka ardhur në familjen tonë, ka qenë gjithmonë një raport shumë i thjeshtë, shumë i sinqertë. Të paktën më mua ka qenë shoqëror. Edhe mamit ja bën kafen. Mamit ja bëjmë ne kafen, s’ja bëka Orinda”, u shpreh Eljo.
Kur u pyet nga Ervin Kurti se çfarë defekti ka Orinda, ai nuk ngurroi t’i përgjigjej edhe kësaj pyetjeje.
“Duhet të zvogëlojë dollapin e këpucëve”, tha Eljo duke qeshur.
Ai shtoi se Orinda gatuan shumë mirë dhe se pjata e preferuar e tij është një tavë me kërpudha që ajo bën. Ndërsa kur u pyet se si do ishte nusja ideale për të dhe nënën e tij, Eljo u përgjigj: “Kam përshtypjen se duhet të jetë versioni brun i Orindës”.
Siç duket Orinda ja ka fituar zemrën gjithë familjes Hysko dhe Turi nuk mund të kishte bërë zgjedhje më perfekte se kaq. Kujtojmë se dyshja e njohur kanë vite që janë të lidhur bashkë, ndërkohë që dashurinë e kurorëzuan me martesë në 2017-tën.
