“Dashuri në kohë Covidi. Duke numëruar ditët”, shkruan Ervin Bushati krah fotos, që poston në rrjetet sociale. Deputeti i PS-së është infektuar me Covid-19. Lajmin e ka dhënë vetë, ku njofton se është në ditën e katërt, ndërsa nuk ka dhëna të tjera mbi gjendjen e tij shëndetësore, apo të bashkëshortes.
Ai komunikon me gruan e vet nga përtej xhamit.
Aktualisht, janë 12 deputetë Covid pozitivë, në Kuvendin e Shqipërisë. Dy prej tyre po mjekohen në Turqi.
Pyetja që ngrihet është se sa qytetarë kanë takuar?
Kur në mars u vendos si praktikë që deputetët diskutimin dhe miratimin e ligjeve ta bënin online, qëllimi ishte shmangia e grumbullimeve në sallat e komisioneve.
Por, mesa duket, ethet e fushatës janë më të forta se ato të Covid-19. Monika Kryemadhi, kryetarja e LSI-së, kundërshtare e fortë e maskës si masë mbrojtëse nga virusi, u gjobit 2 herë për mosmbajtjen e saj teksa zhvillonte takimet elektorale.
Kryetari i Bashkisë Erion Veliaj, pavarsisht pandemisë , shfaqej pa maskë në takimet e tij deri sa u infektua. Vonë, por ndryshe nga Kryemadhi, sipas kryeministrit u vetëkorrigjua.
Pamjet tregojnë se takimet elektorale zhvillohen në ambiente të mbyllura, pa distancë sociale dhe ndonjëherë pa maska.
Ministra e deputetë aktivë në fushatën e parakohshme si Balluku, Klosi, Gjiknuri, Gjylameti, Hajdari e të tjerë rezultuan pozitivë ndaj Covid.
