Anulimi i koncertit të këngëtarit Ermal Meta në Bianco, nuk është pritur mirë nga nënkryetari i bashkisë së qytetit, i cili menjëherë i është kundërvënë këngëtarit shqiptar.
Pasquale Ceratti nuk e ka besuar justifikimin shëndetësor për anulimin e koncertit dhe kështu, duke dalë në mbrojtje të interesave të banorëve, ai ka akuzuar Ermal Metën, se tani që është i pasur pasi erdhi me varkë nga Shqipëria, anulon edhe koncertet.
Por kjo deklaratë e tij nuk është pritur mirë nga komentuesit, të cilët i kanë përmendur atij detyrat e pakryera në Reggio Calabria. Ata e kanë quajtur këtë postim, “fashisht”, “racist” dhe shumë prej tyre kanë vënë në dukje gabimet drejtshkrimore që gjenden në këtë status.
Sigurisht është përgjigjur edhe Ermal Meta duke postuar të plotë në faqen e tij, statusin e nënkryetarit të Bashkisë së Bianco-s, i cili sipas përshkrimit është gjithashtu artist. Meta shkruan që do të kishte dashur të shihte këtë pasion të zyrtarit për çështje më të rëndësishme, si korrupsioni, derdhja e helmeve në det, apo groposja e tyre, vjedhja e parave publike etj. në vend të anulimit të një koncerti që larg e larg, më shumë dëmton vetë Ermalin.
Në fund e mbyll me një ironi që kemi kuptuar që nuk i mungon. “I dashur nënkryetar, në varka mësohej si të përdoreshin shenjat e pikësimit, ta kisha ditur i kisha marrë mësimet me vete. Do të ishin dashur me siguri”, e mbyll statusin e tij Ermali.
