Erkand Qerimaj ka shkruar histori! Ai është shpallur kampion Europe në shkëputje. Qerimaj ka arritur të ngrejë 150 kg në baterinë B.
Paraqitja e tij ishte e shkëlqyer! Qerimaj ngriti 1 nga 3 provat duke korrur një sukses të jashtëzakonshëm për peshëngritjen shqiptare.
Ai gjithnjë ka thënë edhe në intervistat e tij të mëparshme se peshëngritja kërkon një punë të kujdesshme, të cilën e dëshmoi ai po vetë sot.
Ja c’thoshte Qerimaj vite më parë në një intervistë: “Peshëngritja është sport që ka prurje, por kërkohet një punë e kujdesshme për evidentimin e talentit, rritjen e tij dhe natyrisht angazhimin në një shkallë më të lartë. Ka një problem me talentet e rinj këtu te ne, pasi ata “digjen” në kohë të shpejtë dhe nuk është rastësi që ne kemi shumë pak sportistë mbi 25 vjeç në këtë disiplinë, kjo për shumë shkaqe, por kryesisht për keqmenaxhim”.
Nga ana tjetër kujtojmë që peshëngritësja shqiptare, Evangjelia Veli u shpall Kampione Europe në stilin e shkëputjes dhe dygarësh për peshën deri në 55 kg dy ditë më parë.
Jo vetëm kaq, por ajo mori edhe një medalje të argjendtë në stilin e shtytjes në Kampionatin Europian të Peshëngritjes.
Kësaj here, Evangjelia Veli arriti të korrë suksesin që ka kërkuar. Kujtojmë që vjet ajo mori një medalje të bronztë po në këtë disiplinë.
