Transmetimi nga selia e Turning Point USA në Arizona filloi me disa minuta heshtje, teksa kamera tregonte karrigen e zbrazët të Charlie Kirk. Kur gruaja e tij, Erika Kirk, filloi të flasë, ajo ngriti sytë lart dhe pëshpëriti një lutje të heshtur. Më pas, ajo falënderoi ekipet e emergjencës që përpoqën ta shpëtonin, stafin e bashkëshortit të saj dhe Shtëpinë e Bardhë.
“Zoti President, im shoq ju donte. Dhe ai e dinte që edhe ju e donit atë,” tha ajo me lot, duke falënderuar gjithashtu Vance dhe bashkëshorten e tij, Usha, për shoqërimin e arkivolit në Arizona. “Por mbi të gjitha, Charlie i donte fëmijët e tij. Dhe më donte mua, me gjithë zemër. Dhe më bëri të sigurt që e dija këtë çdo ditë.”
Duke iu drejtuar atyre që ajo i quajti “të ligët”, zonja Kirk tha: “Nuk keni asnjë ide për zjarrin që keni ndezur tek kjo grua; britmat e kësaj veje do të dëgjohen në të gjithë botën si thirrje lufte. Ata duhet ta dinë: nëse menduat se misioni i tim shoqi ishte i fuqishëm më parë, nuk keni asnjë ide çfarë sapo keni shkaktuar në të gjithë këtë vend dhe në botë.”
Ajo tha se turneu i bashkëshortit të saj në universitetet amerikane do të vazhdojë gjatë vjeshtës dhe në vitet që do të vijnë, pa dhënë më shumë detaje, dhe se edhe podkasti i tij do të vazhdojë. Erika Kirk foli edhe për fëmijët e tyre, një djalë njëvjeçar dhe një vajzë trevjeçare: “Zemër, babi të do shumë. Mos u shqetëso. Ai është në një udhëtim pune me Jezusin.”
Charlie Kirk, 31 vjeç, ishte një figurë kontraverse në politikën amerikane, i konsideruar nga disa si e ardhmja e konservatorizmit amerikan. Ai mbështeste të drejtat për armë, ishte kundër abortit, kritik ndaj të drejtave të transgjinorëve dhe shpërndante pretendime të rreme për Covid-19, duke polarizuar audiencat dhe duke tërhequr mbështetës dhe kritikë po aq të zjarrtë.
