E rrallë, por jo e pabesueshme! Kujt do t’ia merrte mendja se Era Istrefi do të bëhej pjesë e klasifikimeve të huaja të muzikës me këngën e saj në shqip “Bonbon”.
“Zbuloni sensacionin më të pa rezistueshëm të pop-it në Europë!”, thuhet në faqet e huaja të muzikës. Era Istrefi u vendos ditë më parë si “Kënga e Ditës” në Shazam, ndërsa hyri në Top 100-shen e Britanisë së Madhe, Kanadasë, Francës dhe Gjermanisë, për herë të parë.
Ndërkohë këngëtarja shqiptare ka firmosur një kontratë me “Sony Music”. Era pati dje takimin e parë me menaxherët kompanisë ndërkombëtare të muzikës.
Menaxheri i Erës, Faton Shoshi me kompaninë e tij “Nesër” ka arritur marrëveshje me dy gjigantët botërorë të muzikës, Ultra / Sony Music për të bërë një album për këngëtaren nga Kosova.
Vlera e kontratës është 1.5 milionë dollarë. Producentët me famë botërore, Kygo, Stargate, Danny Blanco, Robin Schulz dhe producenti nga Kosova, Big Bang do të përkujdesen për albumin e ri të Erës.
