Babai i motrave Istrefi, Nezir Istrefi, ka ndërruar jetë 16 vite më parë pas një aksidenti. Nora dhe Era e kujtojnë shpeshherë babanë e tyre të ndjerë dhe kanë treguar se asnjëherë nuk është zbehur dhimbja për to, pavarësisht viteve që kanë kaluar. Babai i motrave të famshme ka punuar si gazetar në televizionin e Prishtinës dhe ka qenë shumë i njohur kur ishte gjallë.
Për këtë arsye Radio Televizioni i Kosovës i ka dedikuar një emision të tërë Nezir Istrefit për të kujtuar edhe një herë punën e tij. Në emisionin “Arkiv” që nderonte figurën e të ndjerit, ishte e ftuar mbrëmjen e sotme nëna e Norës dhe Erës, Suzana Tahirsylaj.
Ajo rrëfeu se si ka qenë jeta e saj me Nezirin, që nga njohja me të deri tek momentet e fundit të jetës. Ka qenë Nora e para që ka ndarë një pjesë nga intervista që e ka ndjekur përmes televizinit dhe është shprehur mjaft krenare për nënën e saj.
“Mami në këtë intervistë shpjegon shumëçka për babin tonë! Vajzë krenare”, ka shkruar Nora.
Ajo u shpreh se ai shijoi vetëm një këngë të Norës dhe se ishte i vetmi që e mbështeste mes tyre për rrugëtimin në muzikë. Suzana tha se ajo nuk ishte dakord që e bija të bëhej pjesë e industrisë muzikore, ndërsa ai i linte të lirë fëmijët të bënin gjithçka që dëshironin. Suzana tha se Nora i ngjason të atit nga pamja e jashtme, ndërsa Era nga zëri i veçantë.
