Derisa të kemi një përballje mes dy ish-kolegëve, marrëdhënia mes tyre do të vijojë të jetë në qendër të vëmendjes së mediave.
Ndonëse Nevina Shtylla i vuri pikë deklaratës së Eni Shehut (lexo këtu), i cili tha se mes tyre nuk ka pasur marrëdhënie shoqërore, gazetari nuk e ka lënë me kaq.
Në një prononcim të dytë për “Anabel.al”, ai u shpreh se nuk sheh asnjë arsye për t’i bërë block askujt, por nuk e mohon që “edhe mund ta ketë shtypur pa dashje” këtë opsion.
Pasi mohoi se mes tyre ka pasur marrëdhënie shoqërore përpos atyre të punës, Eni duket se i ka bërë disi qejfin vetes kur thotë: “Mesa duket i mungoj (profesionalisht)”.
“Uroj të gjejë veten në programin e ri të sportit që mesa kujtoj, e ka përçmuar”, vijon deklarata e tij që i referohet intervistës së Shtyllës në “Pop Culture” pak muaj më parë, ku shprehej se nuk ishte e prirur ndaj futbollit dhe formatit të një emisioni të tillë.
“Iconstyle.al” kontaktoi më herët me moderatoren për të mësuar versionin e saj të ngjarjes. Nevina Shtylla tha se nuk ka asnjë prapaskenë në marrëdhënien mes tyre dhe se jeta vazhdon edhe jashtë rrjeteve sociale:
“Është shumë e drejtë dhe e saktë çfarë ka thënë Eni dhe nuk ka ndonjë prapaskene. Jeta (ajo e vërteta) vazhdon dhe jashtë rrjeteve sociale”!
Aktualisht Nevina ka kaluar në televizionin “Top Channel” ku moderon ‘Procesin Sportiv’ krah Edi Manushit.
