Bota u ngazëllye një ditë më parë kur doli lajmi se vaksina kundër koronavirusit është gati dhe se ajo e “Pfizer”, po testohet me sukses në fazën e fundit të saj.
Vaksina e koronavirusit, e prodhuar nga “Pfizer” dhe “Biontech” ka entuziazmuar mediat dhe politikën në mbarë botën duke e shitur atë si një “sukses të garantuar” apo “shpëtim nga tmerri”.
Madje edhe prestigjiozja “The Economist” shkruante sot se, “ka nisur fundi i pandemisë”. Kjo pasi vaksina ofron një mbrojtje prej 90%, kur skenari më i mirë ishte mbrojtje prej 70%.
Por tani ka lindur një problem tjetër. Sipas gazetës britanike “Times”, vaksina duhet të ruhet në temperaturë minus 70 gradë Celsius, në kuti të posaçme si valixhe.
Kjo ka shtuar shqetësimet se, shpërndarja e vaksinës mund të vonohet. Vaksina duhet të ruhet me shumë kujdes për shkak të materialit gjenetik që përdoret për këtë vaksinë.
Por shumë vende nuk e kanë mundësinë e pasjes së dhomave frigoriferike të posaçme deri nën -70 gradë celsius, në një kohë që shumë shtete të zhvilluara pasi ta kenë marrë, për ta shpërndarë vaksinën po mendojnë që të thërrasin në ndihmë edhe ushtrinë.
Vendet perëndimore shpresojnë që vaksinimi të nisë përpara Krishtlindjeve, por e gjitha deri tani mbetet për t’u parë.
/Burimi: BBC/ Përshtati: Iconstyle.al/
