Problemi i qenve endacakë në Shqipëri dhe keqtrajtimi i tyre ka shkuar edhe përtej kufijve tanë. Emisioni “Striscia la Notizia” vendosi të sjellë gazetarin e tij në vendin tonë, për të parë nga afër këtë çështje, në kërkim të një zgjidhje.
“Gjatë këtyre ditëve dhe udhëtimit në Tiranë kuptuam se duhet bërë ende shumë për sensibilizimin e njerëzve për mirëqenien e kafshëve. Veç “Kopshtit Zoologjik” dhe kushteve të jashtëzakonshme të tij është shumë e thjeshtë të shikosh skena të tilla, të kafshëve që rripen në rrugë. Por një nga problemet më të mëdha është ajo e qenve endacakë. Kudo që rrotullohesh, shikon qen endacakë”, kështu nis shtrimi i problemit nga emisioni italian investigativ.
Më tej gazetari thotë se pikënisja e këtij problemi nis me faktin, se nuk ekzistojnë strehimore publike për kafshët dhe as struktura qeveritare, të cilat mund të zgjidhin këtë çështje. Sipas emisionit, i vetmi sistem që ekziston për të mbajtur në kontroll qentë endacakë është ajo e vrasjes së tyre në mënyrat më absurde, pa bërë asnjë lloj kontrolli të mëparshëm.
Përfaqësuesja e shoqatës “Animal Rescue Albania” thekson se vetëm në Tiranë ekzistojnë 10 mijë qenë endacakë, ndërsa ende nuk ka statistika kombëtare.
“Kushtet e kafshëve janë të tmerrshme, pasi qentë keqtrajtohen, abuzohen dhe nuk ka asnjë ligj”.
Më tej gazetari kalon tek një problem tjetër me rëndësi, të cilën e dallojmë kudo, atë të luftës mes qenve. “Betejat mes qenve publikohen shpesh si publicitete ne mediat sociale”.
Gazetari i emisionit italian shton se, “betejat mes qenve nuk janë të ndaluara edhe pse ndonjë prej kafshëve mund të vdes nuk ekziston vepër penale për këtë krim”.
Pavarësisht se disa pamje nga emisioni janë të viteve të mëparshme dhe vendosjes së ligjit për vendosjen e masave të sigurisë për qentë e rrezikshëm, ky problem vazhdon ende, por më i minimizuar.
Burimi: Striscia la Notizia
