Tre terroristë janë përgjegjës për sulmin që shkaktoi shtatë të vdekur dhe 48 të plagosur pas një breshërie me armë zjarri në Londër.
Ndërkohë sot, mediat britanike shkruajnë se po të mos ishte për pronarin dhe punonjësit e një restoranti në Londër, do të kishte më shumë viktima.
Mark Stembridge tregoi për Hufington Post se stafi i tij, ku 4 prej të cilëve ishin ish-pjesëtarë të ushtrisë shqiptare, ndihmuan njerëzit të hynin brenda ambienteve të restorantit, duke i shpëtuar kështu nga tragjedia, ndërkohë që darkonin në tarracën e lokalit.
“Katër pjesëtarë nga stafi im janë nga Shqipëria dhe disa prej tyre kanë qenë në ushtri dhe janë stërvitur për t’u marrë me konfliktin. Po të mos ishte për ta, klientët mund të kishin humbur jetën”.
“Tre djem po ulërinin…Nuk mund të them me siguri se çfarë po thonin por ajo që vumë re është se ata hezituan kur panë se ne po ruanim qetësinë të organizuar”, thotë ai.
Kështu ata kanë arritur të shpëtojnë shumicën e njerëzve që ndodheshin atje, duke konfirmuar se edhe ata arritën ta fshihnin më së miri panikun përballë terroristëve, të cilët u morën jetën 7 personave dhe lanë 48 të tjerë të plagosur, 21 prej të cilëve janë në gjendje të rendë.
Ata dhe i gjithë stafi, kanë qëndruar të mbyllur për pothuajse një orë e gjysmë derisa u siguruan nga policia. Punonjësit, mes tyre dhe shqiptarët, janë konsideruar si heronjtë e sulmit të fundit të Londrës, akti i të cilëve shpëtoi jetën e qindra njerëzve.
Burimi: Metro.news
