Administrata e Donald Trump është përballur me kritika të forta nga ekspertë të sigurisë kombëtare, pas vendimit për të vendosur një 22-vjeçar në krye të një prej programeve më delikate të Departamentit të Sigurisë Kombëtare (DHS).
Bëhet fjalë për Thomas Fugate, i diplomuar vetëm një vit më parë në Universitetin e Texasit në San Antonio, i cili tashmë drejton Qendrën për Parandalimin e Dhunës së Targetuar dhe Terrorizmit (CP3) — një strukturë me buxhet mbi 18 milionë dollarë dhe përgjegjësi të drejtpërdrejtë për identifikimin dhe parandalimin e sulmeve të brendshme terroriste në SHBA.
Përpara këtij emërimi, Fugate nuk ka mbajtur asnjë pozicion në fushën e sigurisë kombëtare apo zbatimit të ligjit. Përvoja e tij përfshin punë si kopshtar, punëtor në market dhe angazhime në disa organizata konservatore, përfshirë Heritage Foundation, si dhe pjesëmarrje në fushatat politike të vetë Trump.
“Është e papërgjegjshme të vendosësh dikë pa përvojë në një rol kaq kritik për sigurinë kombëtare,” u shpreh një ish-zyrtar i lartë i DHS për ProPublica. “Ky pozicion kërkon vendimmarrje të informuar dhe përballje me rreziqe reale, jo trajnime në nivel praktikantësh.”
Emërimi i Fugate vjen në kuadër të një fushate më të gjerë të administratës Trump për të ristrukturuar Departamentin e Sigurisë Kombëtare, duke reduktuar staf dhe përpjekur thjeshtimin e strukturave federale.
