Zjarri i nisur një ditë më parë në pyllin me pisha të Pish Poros në njësinë administrative Novoselë vazhdon edhe sot. Situata vazhdon të jetë kritike, ndërsa flakët po përparojnë me shpejtësi dhe po shkaktojnë dëme të konsiderueshme në masivet pyjore. Raportime të ndryshme nga terreni tregojnë se zjarri ka djegur kryesisht pisha dhe po afrohet drejt zonës së hidrovorit në njësinë administrative Novoselë, duke rritur shqetësimin për pasojat mbi infrastrukturën dhe komunitetin lokal.
Në terren janë angazhuar forca të shumta të zjarrfikëses dhe emergjencave civile, të cilat po punojnë pa pushim për të vënë situatën nën kontroll. Ndërhyrja është e koordinuar edhe nga ajri, ku një helikopter operon duke marrë ujë nga deti dhe duke e hedhur mbi vatrat e zjarrit për të frenuar përhapjen e flakëve.
Autoritetet kanë apeluar tek banorët e zonave përreth të qëndrojnë të larguar dhe të ndjekin udhëzimet e emergjencave. Shkak për përhapjen e zjarrit raportohet era e fortë dhe temperatura e lartë, që kanë favorizuar shpërthimin e flakëve në masivet pyjore.
Ndërhyrja e shpejtë e forcave zjarrfikëse dhe emergjencave civile mbetet kyçe për të shmangur përhapjen e mëtejshme të zjarrit dhe për të mbrojtur banorët dhe infrastrukturën kritike në zonë. Situata do të monitorohet gjatë gjithë natës.
