Ersida Dyrmishi u bë kryefjalë e mediave në vendin tonë, pasi u largua pa gjurmë nga banesa e saj në qytetin e Durrësit. 30 vjeçarja, nënë e dy fëmijëve u denoncua e zhdukur në Polici nga bashkëshorti i saj, për t’u gjetur më pas në një hotel.
Ersida pretendoi se ishte “marrë peng nën kërcënimin e armës” nga Marjus Musaku, dhe se ishte përdhunuar nga ky i fundit për 9 ditë. Kaq mjaftoi që Marjusit t’i bëhej “gjyqi publik” nga të gjithë, nga aktiviste, gra dhe komentues. Marjusi u “kryqëzua” për aktin e rëndë që supozohej se kishte kryer, dhe më pas u arrestua nga Policia.
Por më pas fakte të tjera dolën në dritë, për shembull mesazhet që vetë Ersida kishte shkëmbyer me “përdhunuesin e saj.”
Në bisedata e publikuara nga familjarët e të riut nga Lushnja, Ersida i shkruante, siç e akuzon ajo “rrëmbyesit dhe përdhunuesit të saj”, se “jam e jotja” dhe se po bëhej gati për të shkuar te ai. Kjo përputhet edhe me deklaratën që vetë Marjusi bëri në Polici ku tha se Ersida kishte shkuar me dëshirën e saj te ai.
“Erdhi me dëshirën e saj. Nuk e kam marrë forcërisht, po erdhi me dëshirën e saj. Po ta kisha marrë me forcë nuk do ta sillja vetë në komisariat. Kemi njohje me njëri tjetrin”, tha Marjus Musaku.
Por çfarë thotë ekspertiza për të vërtetën e kësaj ngjarjeje?
Në fakt ajo që vërtetohet nga ekspertiza mjeko-ligjore, është që Marjusi ka të drejtë dhe ishte 30-vjeçarja ajo që mashtroi Policinë. Sipas familjarëve të Marjusit, ai ndodhet ende në qeli dhe rrezikon nga 10 deri në 25 vite burg. Por duket se akuzat ndaj tij kanë rënë, e ajo që do dënohet është 30-vjeçarja Dyrmishi.
Çështja e tij u rikthye në vëmendjen e publikut sot në emisionin “Shqipëria Live” në Top Channel, ku në studio ishte e ftuar avokatja e tij, Albina Kola.
Avokatja u shpreh se “jemi në fazë hetimi” dhe se kanë bërë kërkesë për ndryshim të masës së sigurisë, por është hedhur poshtë nga gjykata. Po ashtu, avokatja tha se Dyrmishin do e padisin për “kallëzim të rremë”, por gjithashtu raportohet se vetë Ersida nuk ndodhet në Shqipëri pasi ka kërkuar azil politik në Francë.
“Ne kemi bërë një kërkesë në Gjykatë ku kemi kërkuar zëvendësimin e masës së sigurisë, që të hetohej në gjendje të lirë dhe nuk është pranuar. Është shqyrtuar dhe po presim arsyetimin e Gjykatës. Ne po presim vendimin e arsyetuar dhe do të apelojmë. I kemi çuar të gjitha provat dhe janë pranuar. Madje janë këqyrur edhe bisedat telefonike dhe janë gjetur fotot intime. Ersida pretendon se është ushtruar dhunë, janë droguar dhe është përdhunuar. Por sipas ekspertizës, Ersida nuk është përdhunuar, gjithashtu ka dalë se nuk kanë konsumuar drogë. Do e çojmë në apel. Ersida është viktimë dhe për momentin është në dëshirë të saj nëse do të paraqitet në Gjykatë. Përfaqësuesja e saj ka thënë se ndodhet jashtë shtetit në gjendje të rëndë, me ankth. Ne kemi çuar si provë një deklaratë të mbesës së Marjusit, por nga ana e Prokurorisë ne nuk e kundërshtojmë se ata kishin lidhje, por se ai e ka mbajtur me zor,”- tha Kola.
Ndërkohë motra e Musakut, Edlira tregon komunikimin e fundit që ka pasur me të vëllanë.
“Marjusi është shumë i acaruar, po kalon në depresion. Ajo po e mban brenda. Dua të vijë dhe të thotë të vërtetën për vëllain tim se nuk e ka marrë me zot. Vëllai im nuk ka pse ta kërcënojnë. Po të ishte nga ata vëllai im…Duhet të gjendet e drejta ime thotë”– u shpreh ajo.
Fotoja e Ersida Dyrmishit, e publikuar fillimisht nga bashkëshorti i saj, bëri xhiron e rrjetit dhe u ripostua nga shumë përdorues të mediave sociale që kërkonin ndihmë gjetjen e saj. Pasi ajo u gjet dhe deklaroi se ishte përdhunuar, ajo pati në anën e saj opinionin publik duke dalë si “viktima” e rastit të rëndë. Ngjarje të tilla sigurisht bëjnë bujë në një vend të vogël si Shqipëria, ku vendi “ngrihet në këmbë” kur vjen puna për të mbështetur me një status një grua që thotë “jam sulmuar ose përdhunuar”. Jo vetëm qytetarët dhe përdoruesit e mediave sociale, por edhe autoritetet e institucionet tregohen të gatshëm për të prangosur e dënuar burrat, kur bëhet fjalë për një ngjarje që merr përmasa të mëdha në publik, dhe dihet impakti që ka. Dhe siç dëshmoi sot avokatja e Marjusit, edhe ekspertiza ligjore hidhet poshtë.
Dhuna ndaj grave është një plagë e shoqërisë Shqiptare, por pa anashkaluar rastet e rënda të dhunës ndaj grave që janë regjistruar në vendin tonë, duhet thënë se është koha që edhe shoqëria të përballet me një të vërtetë të shëmtuar: Nuk janë vetëm burrat, të cilët mund të jenë vrasës, sulmues të dhunshëm ndaj seksit tjetër dhe mashtrues.
Në rastin e Ersida Dyrmishit, të gjithin ishin aty për ta mbështetur, njëkohësisht për të dënuar “monstrën” që tha se e kishte përdhunuar. Por çfarë dihej për të vërtetën e ngjarjes? Asgjë konkrente, ishte fjala e Ersidës kundër asaj të Marjusit. Dhe ajo çfarë u vu re është se fjala e këtij të fundit nuk u mor aspak për bazë, përkundrazi të gjithë ishin gati për ta gjykuar veprimin e tmerrshëm që Ersida tha se ai kishte kryer, edhe pse prova nuk kishte. Pse? Sepse vetëm burrat gënjejnë dhe mashtrojnë, ndërsa gratë janë “viktimiat e tyre?”
Tani që provat zyrtare dolën në dritë, doli që në fakt është krejtësisht e kundërta. Ersida fajtore, ndërsa Marjusi i pafajshëm, ende në burg.
