Për të pasionuarit pas makijazhit, sot ishte një ditë shumë e veçantë: Master Class-i i Mario Dedivanoviç në Tiranë. 2000 persona 40% prej të cilëve ishin nga Evropa, por edhe nga Amerika, India, Dubai, Izraeli, Egjipti, etj. u ulën në karriget e Pallatit të Kongreseve për të parë nga afër truket e një makijazhi perfekt.
Mario nuk njihet vetëm si grimieri i preferuar i Kim Kardashian, por edhe i shumë emrave të njohur nëpër botë, Jennifer Lopez, Katy Perry apo Megan Fox.
Eventi i cili kishte nisur përgatitjet muaj më parë, përfundoi me sukses ditën e sotme me një kohëzgjatje prej rreth 3 orësh.
Të gjithë ata që kishin siguruar biletat arritën të shikonin me detaj çdo produkt apo ngjyrë që përdorte Mario, për të realizuar një makijazh të pastër dhe që nxjerr në pah tiparet më të bukura te të gjitha.
Rreth 10 kamera ishin vënë në dispozicion të eventit, të cilat nën regjinë e Iv Tases, arritën të kapnin çdo moment të grimit në mënyrën më të qartë.
Në dy video ekskluzive të siguruara nga “iconstyle.al” arritëm që të kuptonim dy nga sekretet e makijazhit që sugjeron grimieri shqiptar.
Në videon e parë Mario Dedivanoviç tregon se pasi të mbaroni me pluhurat te sytë, të përdorni një furçë të pastër dhe të lyer vetëm me pak pudër, në këtë mënyrë do të keni një makijazh të pastër.
Ndërsa këshilla e dytë është me lapsin e zi. Nëse keni sy të vegjël, atëherë nuk duhet ta përdorni në pjesën e sipërme të qepallës, por vetëm në pjesën e brendshme, si rasti në fjalë:
Në fund të eventit secili prej pjesëmarrësve mori një çantë me disa produkte shumë cilësore dhe të shtrenjta.
Kërkesat për këtë Master-Class-in ishin të larta, saqë biletat u shitën në kohë rekord. Ky event shërbeu si një promovim mjaft i mirë për Shqipërinë, pasi shumë huaj mbërritën në vendin tonë për të ndjekur posaçërisht nga afër Marion.
