Më datën 19 të këtij muaji, Capital T do të mbajë koncertin e tij të parë recital, i cili do të titullohet “Time Capsule”. I lodhur nga koncertet e zakonshme të club-eve, ai i ka premtuar publikut diçka të jashtëzakonshme që do të mbetet gjatë në memorien e të gjithëve.
Ditën e sotme ai ka dale në një konferencë për mediat, duke na dhënë detaje për gjithçka që do të ndodhë në “Sheshin Nënë Tereza” më 19 shtator.
Sipas organizatorëve të eventit, “Time Capsule” do të jetë koncerti më madhështor i mbajtur ndonjëherë në Tiranë, ku me siguri Capital T do të ndezë publikun me hitet e tij dhe do t’i argëtojë pafund qytetarët.
Skena do të ketë disa nivele e kënde ku do të mund të shijohet koncerti, shoqëruar me parking, merchandise, ushqim, pije dhe sigurim të lartë.
Stafi i tij premton se do të ketë surpriza pafund, koreografi të ndryshme, balerinë, ndriçim të jashtëzakonshëm dhe gjithçka tjetër.
Detaji i veçantë në “Time Capsule” do të jenë byzylykët në dorë me drita shumëngjyrëshe. Byzylykët do të lëshojnë drita me ngjyra të ndryshme dhe do të lidhen me një panel, duke marrë pjesë në performancë teksa koordinohen me skenën ku do të qëndrojë këngëtari. Ky është një detaj që do ta bëjë koncertin super të veçantë, ku publiku do të përfshihet për herë të parë 100&%.
Puna për koncertin ka filluar 6 muaj më parë dhe pritet që Capital T të këndojë vetëm këngët e repertorit të tij.
Gjatë konferencës, këngëtari tregoi se ky projekt ishte arsyeja që ai ka qëndruar larg koncerteve të shumta, si kolegët e tij. Prej kohësh ai është marrë me planifikimin dhe organizimin e tij, për të sjellë më të mirën tek publiku.
I pyetur pse ka zgjedhur Tiranën dhe jo Prishtinën, ai u shpreh se kjo zgjedhje vjen vetëm për arsyen se Tirana është kryeqyteti i të gjithë shqiptarëve. Mirëpo, këngëtari ka plane edhe për Prishtinën dhe pritet të sjellë surpriza edhe në qytetin e tij.
Capital T u shpreh se në koncertin e tij do të marrin pjesë edhe emra të njohur të muzikës, por emrat e tyre do të mbeten surprizë deri në momentin që do të shohim koncertin.
Pas koncertit, Capital T do të përcaktojë edhe një datë për dokumentarin e jetës së tij, për të cilin ka njoftuar prej kohësh.
I pyetur se ç’do të ndodhë me Capital-in pas koncertit madhështor, këngëtari u shpreh se ai ende nuk e di çdo të ndodhë pas projektit më të rëndësishëm të jetës së tij. Gjithçka varet se ç’do të ndjejë ai; mund të heqë dorë nga muzika apo të sjellë një album të ri, siç u shpreh edhe vetë. Ende nuk dihet asgjë për këtë pjesë.
Nëse vazhdon të qëndrojë në muzikë, në projektet e tij të ardhshme këngëtari beson se do të sjellë këngë në nivel ndërkombëtar, megjithatë do të fokusohet që të këndojë gjithmonë shqip.
“Mendoj që gjuha jonë është shumë e mire.”- shprehet ai gjatë konferencës.
Ky koncert madhështor do t’i dedikohet familjes së këngëtarit, fansave dhe miqve të tij. Capital-i ka një falenderim të veçantë për personat që qëndrojnë pas koncerit të tij, duke bërë një punë kolosale dhe duke bërë realitet atë që ai ka ëndërruar prej kohësh.
Koncerti do të zgjasë rreth 2 orë dhe do të ketë rreth 20 këngë të këngëtarit.
Meqenëse është një “udhëtim në kohë”, do të ketë një udhëtim në kohë si me këngë të vjetra të tijat, ashtu edhe me të rejat. Me siguri në koncert do të dëgjojmë për herë të parë këngë të cilat ai ende nuk i ka lançuar.
I pyetur pse ka zgjedhur datën 19, menaxherja e tij u shpreh se data 19.09.2019 është një date shumë seksi, e cila do të mbahet mend gjatë në memorien e të gjithëve. Një koncert që s’e kemi parë më parë, me përfshirje të plotë të publikut- kjo është ajo që do t’i ofrohet publikut, më shumë sesa një recital i thjeshtë i një këngëtari.
Ne po presim me padurim datën 19 për të parë koncertin madhështor dhe për të shijuar magjinë të cilën Capital T po punon prej muajsh që të na e ofrojë.
