Efektivja Ina Nuka që mbeti e plagosur pasi një kapsollë i shpërtheu në duar gjatë protestës së banorëve të Astirit të enjten, do të operohet këtë të shtunë.
Ashtu siç tha edhe kryeministri Edi Rama, efektiven Nuka e pret një operacion i gjatë dhe i vështirë sot në Turqi, pas plagosjes në njërën dorë.
“Iconstyle.al” kontaktoi sot me efektiven, e cila ndodhet e shtruar në spital dhe mësoi se ndërhyrja do të kryhet sot në orën 20:00.
Ina Nuka nuk u ndal më tepër në detaje rreth incidentit, por ndau me ne një shqetësim që e mundon këto dy ditët e fundit.
Në rrjetet sociale janë përhapur shumë adresa në emrin e saj dhe efektivja u bën thirrje të gjithëve që të respektojnë privatësinë.
Ajo madje ka parë se shumë profile që mbajnë emrin e saj shahen me njëri-tjetrin nëpër komente në rrjetet sociale, ndërsa u lutet të gjithëve të mos flasin në emër të saj.
Ndërkohë Policia e Shteti ka shoqëruar të riun 18-vjeçar që dyshohet se ka hedhur kapsollat në drejtim të efektives. Daniel Drobaj, banues në Tiranë, ka hedhur poshtë akuzat për plagosjen e efektives në dëshminë e dhënë para uniformave blu (lexo këtu).
Stafi i “iconstyle.al” i uron shërim të shpejtë efektives.
