Ekzekutimi i 25-vjeçarit Klodian Rasha, nga efektivi i forcave Shqiponja Nevaldo Hajdaraj ishte tema e diskutimit sonte në emisionin “As pro, as kundër”, ku gazetari Artan Hoxha tha se punonjësit e repartit “Shqiponja” janë të rinj që vijnë nga një kurs 6 mujor i shtetit.
“Kemi dy viktima, një që vjen nga represioni i pushtetit dhe një tjetër që vjen nga keq menaxhimi. Punonjësit e Shqiponjës janë të rinj që vijnë nga kursi 6 mujor i shtetit, duhet të kalojnë një periudha 3 vjeçare akademinë e sigurisë. Ata bëjnë instruktazhe. Por 6 muaj është shkolla” tha Hoxha.
Ndërkohë, ish-drejtuesi i policisë Arben Hajdarmataj tha se “Mua më rezulton se polici është emëruar jashtë kritereve”. Nevaldo Hajdaraj kishte 3 vite që ishte pjesë e Policisë së Shtetit dhe pak ditë që kishte kaluar te “Shqiponjat”.
Hoxha po ashtu shpjegoi edhe kronologjinë e vrasjes së të riut nga polici. Hoxha u shpreh se gjithçka ndodhi në 3 minuta dhe përpara vrasjes ka pasur një përplasje fizike mes efektivit dhe Klodian Rashës.
“Qitja që i ka marrë jetën Klodian Rashës ka qenë një e vetme, polici ai ka bërë dy, një predhë shkoi në ajër, tjetra nga pas shpine në zemër. Janë konstatuar viktimës plagë në pjesën e pasme të kokës dhe përpara në pjesën kockore të hundës dhe ballit që nuk justifikohen me goditjen kur u rrëzua në tokë. Ka dyshime sipas ekspertëve se mund të ketë pasur një përplasje fizike mes policit dhe viktimës. Por hetimi vazhdon. Viktima nuk ka qenë i armatosur. Gjithçka është realizuar brenda 3 minutave, kontakti pamor, ndjekja, lëvizja dhe goditja e tij. Vetëm fakti që goditja ka ardhur pas shpine është një rrethanë tepër rënduese për efektivin. Largësia e qitjes ka qenë diku 6 metra. Kamerat e sigurisë tregojnë se ka pasur përpjekje për ta kapur” tha ai.
Pas disa orësh mes kaosit, rrëmujave, dhunës dhe shkatërrimeve ka përfunduar edhe protesta e ditës së sotme.
Ajo nisi në orën 18:00, kur qytetarët u mblodhën sërish përpara Ministrisë së Brendshme, për të kërkuar drejtësi pas vrasjes së 25-vjeçarit Klodian Rasha, nga efektivi i Shqiponjave Nevaldo Hajdaraj. U deshën 10 minuta nga nisja e protestës që qytetarët të gjuanin me gurë dhe sende të forta drejt policëve, të cilët ndryshe nga dje sot u treguan vetvetja.
Kreu i qeverisë hoqi përgjegjësinë nga struktura e Policisë së Shtetit dhe e drejtoi atë vetëm te një individ, por në fakt qytetarët e dinë se kjo strukturë është e kalbëzuar, që nga hyrja në këtë strukturë, shmangia e përgjegjësisë, mostrajtimi i duhur në Akademinë e Policisë, etj.
E gjithë struktura nga Drejtoria e Policisë, te Shërbimi i Çështjeve të Brendshme dhe Ankesave deri tek Forcat Shqiponja, të gjithë drejtuesit duhet të largohen. Konkretisht, “iconstyle.al”, duke iu bashkuar nismës së protestuesve dhe kërkesës së tyre, kërkon largimin e :
-Muhamet Rrumbullaku, drejtor i SHÇBA, që manipuloi hetimin.
-Ardi Veliu, drejtori i Policisë së Shtetit.
-Gjovalin Loka, drejtori i Departamentit për Sigurinë Publike, mban përgjegjësi për dhunën ndaj protestuesve.
-Rebani Jaupaj, drejtor i Policisë Tiranë duhet të mbajë përgjegjësi pse policia ishte pa kamera në trup natën e ekzekutimit të Klodianit.
Ditën e nesërme do të zhvillohet sërish protestë për vrasjen e Klodian Rashës nga efektivi i policisë, mëngjesin e së hënës.
Në një hyrje live në emisionin “Opinion” një nga protestuesit ka thënë se protesta do të nisë në orën 16:00, duke shtuar se nga posti duhet të dorëhiqen edhe zyrtarë të tjerë.
