Kryeministri Edi Rama i ftuar në “Studio e hapur” të Eni Vasilit ka folur për stilin e tij të veshjes. Kohët e fundit veshja e tij ka qenë në qendër të debateve dhe komentet negative nuk kanë munguar.
Edi Rama është ndër të vetmit Kryeministra që në takimet zyrtare vishet me atlete, me bluza pambuku të stampuara dhe me çitjane. I pyetur nga gazetarja Eni Vasili për këtë stil veshjeje Rama tha që nuk janë më kohërat e komunizmit kur njerëzve iu tregohej çfarë duhet të vishnin. Ai përmendi fenomenin e prerjes me gërshërë të pantallonave të atyre që i mbanin sipas modelit kauboj, në vitet e diktaturës, për t’i çuar më pas në polici.
“Ato kohë kanë ikur, nuk jemi më në komunizëm”: tha Rama.
Eni Vasili i tha që veshja e një kryeministri duhet t’i nënshtrohet një protokolli dhe etike.
“Unë i njoh shumë mirë rregullat dhe askush në botën që ka krijuar protokollin nuk është shqetësuar për këtë”: tha Kryeministri me këmbëngulje.
Ndërsa për çitjanet, ai saktësoi që i quante shallvare dhe që i kishte pasur ëndërr që kur i kishte parë për herë të parë në Lushnjë në vitin 1987.
Një ëndërr 30 vjeçare e Kryeministrit! Nëse nuk do e kishte thënë, do mendonim mos ishte thjesht një mënyrë për të tërhequr vëmendjen.
