Kreu i qeverisë, Edi Rama i ka dhënë sot efektives së policisë, Ina Nuka, medaljen e mirënjohjes pasi u plagos në detyrë gjatë protestës së banorëve të Astirit para Kuvendit.
Gjatë një takimi me Policinë e Shtetit, kryeministri i puthi dorën që iu plagos efektives, ndërsa u shpreh se sot është dita e duhur për t’i dedikuar Inës dhe të gjitha vajzave që shërbejnë në policinë e shtetit.
Ai falenderoi policinë e shtetit në emër të tij dhe të shqiptarëve që gjithçka shkoi mirë në zgjedhjet e 30 qershorit.
Fjala e kryeministrit Rama:
“Faleminderit në emrin tim dhe të gjithë shqiptarëve që sot ndihemi të çliruar për 30 Qershorin. Faleminderit që ia dolët ndaj një plani politik antikombëtar, kundër zgjedhjeve, kundër integrimit të Shqipërisë, faleminderit për punën, mundin të forcave të Policisë së Shtetit për punën e palodhshme.
Një mirënjohje e falenderim të veçantë për 60 efektivët e lënduar gjatë dhunës agresive kundër shtetit. Më vjen mirë që këtu mes jush ndodhert simboli i rezistencës, kolegia dhe mikja juaj, tani e them dhe me krenari edhe mikja ime, Ina Nuku. Ina ra pre e një sulmi qorr. Një vajzë e zonja dhe e bukur me rezultate shumë të mira, studente shumë e mirë. Ina u plagos rëndë përballë politikës së rrugës. Ina Nuku reagoi menjëherë ndaj një sulmi që i rrezikoi jetën, por nuk shpëtoi dot dorën. Sot është dita e duhur për t’i dedikuar Inës dhe të gjitha vajzave që shërbejnë në policinë e shtetit me akordimin e yllit të mirënjohjes së kryeministrit’, tha Rama.
