Brenda vjeshtës së këtij viti autostrada Tiranë-Durrës do të bëhet me pagesë.
Ministria e Infrastrukturës dhe Energjisë po planifikon nënshkrimin e kontratës koncesionare për autostradën, ku ndër të tjera synohet që kalimi për automjetet të bëhet me pagesë.
Këtë lajm e ka konfirmuar edhe ministrja Belinda Balluku, në një intervistë për “Tv Scan”, ku është shprehur se projekti për aksin iu është dorëzuar investitorëve ndërsa pritet shprehja e interesit ndaj tyre.
“Rruga Tiranë-Durrës është dorëzuar në duart e disa investitorëve të huaj që kanë treguar interes, pasi ai është aksi kryesor që lidh kryeqytetin me portin tonë ndërkombëtar. Ashtu sikurse dihet, ajo autostradë prek zonën industriale të Shqipërisë dhe jo vetëm Tiranën apo Durrësin. Kështu që, besoj edhe interesi nga ana e investitorëve, shumë shpejt do të jetë i shprehur. Ndaj mendojmë që të gjitha këto projekte, vjeshta do t’i gjejë në kohën e nënshkrimit të kontratave dhe të realizimit të tyre”, tha ministrja.
Balluku sqaron më tej se të gjithë projektet e rrugëve që synohen të jenë me pagesë, do të kenë edhe alternativën e tyre, që mund të aksesohet falas. Pra, autostrada do të bëhet me pagesë, vetëm pasi të jetë rehabilituar rruga dytësore alternative e Ndroqit.
Sa i përket çmimit, deri më tani thuhet se automjetet e vogla do të paguajnë 2 euro, ndërsa për ato të mëdha tarifa do të jetë 5 euro.
/Dita.al
