Dasma e shumpërfolur e trashëgimtares së “Top Channel”, Sara Hoxhës dhe moderatorit Ledion Liço, e cila u organizua në Como të Italisë, tërhoqi vëmendjen e të gjithëve edhe për mënyrën elegante se si kishin zgjedhur të visheshin personazhet e famshëm të pranishëm në këtë ceremoni.
Nisur nga komentet e shumta pozitive që morën të famshmit në lidhje me veshjet plot stil që kishin zgjedhur për dasmën e Sarës dhe Ledionit, “iconstyle.al” organizoi një sondazh për të zbuluar se cili është personazhi që u vesh më bukur në këtë ceremoni.
Lexuesit e “iconstyle.al” kanë votuar se personazhi i famshëm i veshur më bukur në dasmën e shumëpërfolur të Sarës dhe Ledionit është politikania Grida Duma.
Ajo është një ndër politikanet shqiptare që tërheq gjithmonë vëmendjen me stilin e saj të veçantë të veshjes.
Ndryshe nga sa jemi mësuar ta shohim zakonisht me kostume serioze, Grida u shfaq në këtë dasmë me një fustan të zi të gjatë, të dizenjuar me lule në pjesën e dekoltesë. Një fustan mjaft elegant, të cilin e kishte kombinuar me një palë sandale të zeza, ndërsa për bizhuteri kishte zgjedhur të përdorte një palë vathë të gjatë.
Në vend të dytë si e veshura më bukur është renditur moderatorja Alketa Vejsiu, e cila kishte zgjedhur një fustan të kuq, të gjatë , mjaft figurant që tërhoqi vëmendjen e të gjithëve.
Ndërsa në vend të tretë është renditur çifti i dashur i showbiz-it shqiptar, Alban Skënderaj dhe Miriam Cani.
Albani u shfaq me një kustum të zi mjaft elegant, ndërsa Miriami me një fustan të gjatë me ngjyra mjaft të ëmbla, të cilin e kishte kombinuar edhe me një mini-çantë në formë buzësh.
