31-vjeçari Xhafer Mata qëlloi për vdekje ish të dashurën e tij Xhuljeta Çuni, këtë të premte në Tiranë, pranë një kishe në zonën e Don Boskos. Pasi qëlloi 19-vjeçaren, në kushte të rënda psikologjike, ai i dha fund edhe jetës së tij.
Mediat raportuan se Mata ishte divorcuar nga bashkëshortja e tij, me të cilën ka edhe një fëmijë 1 vjeç, për shkak të lidhjes gjashtë mujore me 19-vjeçaren. Sipas dëshmitarëve, Xhuljeta kishte kërkuar disa herë ndarjen, por ky vendim nuk është pranuar nga i riu nga Kukësi. “Panorama” mëson se vajza ishte maturante dhe sot po shkonte për të dhënë provimin e Letërsisë. Për 5 muaj, ajo kishte punuar si shitëse në një market të zonës, punë të cilën e kishte lënë që në muajin shkurt për shkak të provimeve dhe do të kthehej aty me të mbaruar shkollen.
