Pamje të trishtueshme kanë mbërthyer shqiptarët sot para ekranit, gjatë përplasjes së përmbarimit me banorët të zonës së “Petro Ninit” në Tiranë.
Banorët mbrojtën dyert me trupat e tyre për të penguar përmbaruesit të hyjnë brenda në banesë, të cilën u kanë kërkuar ta lirojnë pas vendimit të gjykatës.
Forcat e rendit nuk kanë ndërhyrë gjatë momentit kur banorët kanë gjuajtur me vezë përmbaruesit, por kanë shmangur përplasjet fizike.
Ata u angazhuan që të largojnë disa prej familjarëve dhe fëmijëve të vegjël që janë shtrirë përtokë duke bllokuar qarkullimin e automjeteve. Ky reagim nuk është pritur aspak mirë nga publiku.
Edhe ministri i Brendshëm, Sandër Lleshaj ka reaguar pas situatës dhe është shprehur se mirëkupton reagimin ndaj policisë, pasi kjo e fundit nuk është treguar efikase dhe dinjitoze.
Një reagim ndaj mediave ka bërë edhe kreu i qeverisë Edi Rama, i cili shprehet se qeveria ska fuqi mbi vendimet e gjykatave.
“Të trishtueshme pamjet nga rruga e shtëpisë ku kërkohet ekzekutimi i një vendimi gjyqi të formës së prerë. Por e trishtueshme edhe se si Kazani i përzien gjërat pa lidhje! Qeveria s’ka asnjë fuqi mbi vendimet e gjykatave dhe policia e ka detyrim ligjor t’i përgjigjet Përmbarimit”, shkruan ai.
Por pavarësisht se është dënuar sjellja e tyre, kjo situatë ka qenë prekëse për disa prej efektiveve, të cilat siç duken nga fotot më poshtë shfaqen me lot në sy, ndërsa mundohen të qetësojnë familjarët.
