Deri më tani nga lëkundjet e forta të tërmetit shkatërrues që është regjistruar dje, pranë ishujve Dodekanezë të Greqisë, të cilët janë edhe pranë Turqisë, janë shënuar 35 viktima dhe mbi 885 persona janë plagosur. Në Greqi, në ishullin Samos që u prek gjithashtu nga tërmeti, vdiqën dy të rinj, adoleshentë, teksa ktheheshin nga shkolla.
Së fundmi, një tjetër person me origjinë nga Kosova ka vdekur si pasojë e lëndimeve të marra pas rrëzimit të ndërtesës në Izmir. Lajmi është konfirmuar nga ambasada e Kosovës në Turqi me anë të një postimi në Twitter.
“Nga komunikimet e vazhdueshme, Ambasada e Republikës së Kosovës në Ankara është informuar se dy persona me origjinë nga Kosova nga familja Doğrayan në Izmir kanë ndërruar jetë si pasojë e termetit. Mund të konfirmojmë se deri më tani nuk ka të dhëna për shtetas të RKS”, thuhet në komunikatë.
Nuk dihet nëse personi i dytë që ndërroi jetë në këtë tragjedi është djali i 62 vjeçares, që u konfirmua si viktimë e parë.
Më herët ditën e sotme, ndërroi jetë Nazmiye Doğrayan 62-vjeçe, teksa djali i saj ndodhej në gjendje të rëndë pasi të dy gjetën pas 24 orëve nga kërkimet.
“Nëna dhe djali u gjetën të përqafuar në rrënoja. Nëna e kishte mbuluar djalin me trupin e saj. Djali 28-vjeç është në gjendje të rëndë për jetën”- raportuan mediat.
