Poeti i njohur, Lefter Çipa, është shuar ditën e sotme në moshën 79-vjeçare. Lajmin e trishtë e ndau djali i tij, Aleksandër Çipa, përmes një postimi në rrjete sociale. Ai ka publikuar një foto të të ndjerit dhe përkrah ka shkruar: “Lamtumirë!”.
I njohur edhe si mjeshtri i Polifonisë labe, Lefter Çipa ndërroi jetë pas një beteje të gjatë me një sëmundje të rëndë.
“Në fillim të vitit 2020, im Atë, nisi të vuante prej dhimbjesh që vinin prej “fjetjes” së gjakut në trupin e tij. Nga kjo drumitje, sikurse shprehet ai, e gjakut nëpër trup, të parat që po i ndëshkoheshin ishin këmbët. Kalcifikimi i enëve të gjakut dhe gangrenizimi i gishtërinjve dhe krejt shputës së djathtë, në dy herë të njëjpasnjëshme ndërhyrjesh kirurgjikale, ia humbën atë.
Në këto përpëlitje të përbindshme, humbi hapin dhe lëvizjen. U mbërthye burri që kishte konsumuar gjithë versionet e udhëtimit në jetë. Ndali hapin e palodhur të këmbëve të veta”, shkruante Aleksandër Çipa për të atin pak kohë para se ai të ndërronte jetë.
Lefter Çipa ka botuar 18 libra me poezi dhe ka lënë një kolanë në proces redaktimi për botim. Ndër librat e tij më të njohur janë: “Bejkë e bardhë”, “Bilbilat e vendit tim”, “Shqipëri moj ballëhapur”, “Dheun tim përsipër mbaj”, “Për Kosovën prapë do të ngrihem”, “Kënga që tret lotin”, “Këngët e Akroqeranit”,”Princi i Dashurisë”, etj.
I konsideruar si “princi i sotëm” i polifonisë shqiptare, Lefter Çipa ka lënë pas mbi 1250 këngë të shkruar të interpretuara nga grupet e famshme të isopolifonisë. “Bejkë e bardhë”, “Vijnë djemtë nëpër vapë”, “Këngë kurbeti”, “Vito Pëllumbesha”, “Hënëz e qiellit të gjerë”, “Moj unaza gur jeshile”, “Në sokak të ngushtë”, “Lundroj në lundrën e këngës”, “Kënga e manushaqes”, ” Zonjë e bukurisë”, janë disa nga këngët që mbajnë vulën e tij.
Poeti i ndjerë është nderuar me çmime dhe dekorata, ndër të cilat me më të lartën “Nderi i Kombit”.
