Familja e legjendës së futbollit, Michael Ballack ështe në zi. Një aksident rrugor rezultoi fatal për të birin e tij 18-vjeçar, Emilio Ballack.
Sipas policisë, i riu ka ndërruar jetë rreth orës 2 të mëngjesit të së enjtes. Tragjedia ndodhi në Troia, në jug të Lisbonës, afër një shtëpie që babai i tij, futbollisti i madh bleu vite më parë.
Përpjekjet për ta shpëtuar të riun në vendin e ngjarjes ishin të pasuksesshme pasi fatkeqësisht ai kishte ndërruar jetë në vend. Detajet e aksidentit fatal nuk janë bërë ende publike.
Trupi i 18-vjeçarit është dërguar në Institutin e Mjekësisë Ligjore në qytetin Santiago de Cacem në jug të vendit për një autoposi.
Emilio ishte një nga tre fëmijët e Ballack që ish-futbollisti gjerman ka me ish-gruan, Simone Lambe. Ai lindi në vitin 2002, një vit pas djalit të madh, Louis, dhe tre vjet para se më i riu, Jordi.
Ballack është aktivizuar me klube si Bayern Munchen, Bayer Leverkusen dhe Chelsea, teksa zhvilloi 98 ndeshje (42 gola) me kombëtaren e Gjermanisë. 44-vjeçari u tërhoq nga futbolli profesionist në 2012 dhe konsiderohet si një nga futbollistët më të mëdhenj të Gjermanisë të të gjitha kohërave.
Ky lajm ka tronditur mbarë botën e futbollit dhe jo vetëm, të cilët kanë shprehur ngushëllimet më të sinqerta për legjendën e Gjermanisë dhe familjen e tij.
