Babai i 3 fëmijëve, i cili është braktisur nga gruaja, kërkoi sot ndihmë në emisionin “Historia Ime” për të vegjlit e tij.
Ariani nga Tirana u shpreh se bashkëshortja e tij Elida e ka braktisur dhe tani i duhet të rritë vetë fëmijët, njëri prej të cilëve është me autizëm.
Në një rrëfim publik, Elida pranonte se e kishte denoncuar dy herë Arianin për dhunë dhe ai ishte dënuar me 8 muaj burg.
Debatet sipas saj lindnin nga xhelozia e Arianit, i cili edhe në këtë rast sipas Elidës nuk kishte faj, sepse ajo e kishte tradhtuar gjatë kohës që ai ishte në burg.
Në emision, bashkëshortët u pajtuan për hir të familjes dhe duket se marrëdhënia mes tyre u përmirësua. Por një ditë, Elida e braktisi sërish bashkëshortin dhe fëmijët e saj. Ariani mbeti vetëm me 3 fëmijët. Fëmija më i madh është 5 vjeç, vajza, e cila është me autizëm, vetëm 2 vjeç dhe fëmija i tretë vetëm 1 vjeç.
Ariani tregoi situatën e vështirë në të cilën ndodhet, mungesën e përkrahjes nga ana e familjarëve të cilët e kanë paragjykuar, ndërsa bëri thirrje për ndihmë, për 3 fëmijët e mitur.
“Unë kam bërë dy herë burg dhe prap kam ardhur tek fëmijët dhe e kam falur për tradhtinë që më ka bërë shumë herë, e kam falur për hir të fëmijëve. Njërën gocë e kam me autizëm, është dy vjeçe. Kam menduar se do kthehet, do pendohet dhe do shpërblejë me sjellje atë që ka bërë shumë herë”.
“Unë i bëj apel shtetit dhe sidomos Erion Veliajt. Jam banor i njësisë numër 1, kam punuar në shërbim të popullit 15 vite shofer autobusi dhe e kam pasur shtëpinë tek Materniteti i Ri, që u shembën dhe kërkoj nga ai një banesë sociale për këta fëmijë dhe një ndihmë për këta fëmijë”.
/Klan tv
