Një ngjarje e rëndë është shënuar në qytetin e Beratit, ku një 16-vjeçare ka helmuar veten pasi kërcënohej nga një moshatar me publikimin e një videoje në internet.
“BalkanWeb” mëson se adoleshentja A. Çaçi është përcjellë mesditën e sotme për në banesën e saj, pasi dy ditë më parë helmoi veten me fostoksinë.
16-vjeçarja merrte vazhdimisht shantazhe në telefonin e saj nga 17-vjeçari, i cili e kërcënonte se do të bënte publike një video të sajën.
A. Çaci, ishte nxënëse në Shkollën e Mesme Profesionale të qytetit të Beratit, në vitin e parë, ndërsa D. Kovaçi, tashmë i arrestuar nga policia, ishte nxënës në të njëjtën shkollë me vajzën.
Dy të rinjtë nuk ishin në një klasë dhe besohet se njohja mes tyre ka ndodhur gjatë aktiviteteve jashtëshkollore, ku të dy merrnin pjesë.
Familjarët e tronditur nga ngjarja shprehen se nuk e kishin kuptuar gjendjen depresive të vajzës dhe askush nuk dinte se ajo kërcënohej nga një djalë. Sipas dëshmive, 16-vjeçarja ishte një vajzë e edukuar dhe e urtë dhe se, lajmi i trishtë ka tronditur pa masë të gjithë ata që e njihnin.
Në lidhje me kërcënimet që i vinin çdo ditë nga 17-vjeçari D. Kovaçi, nuk ishte në dijeni as drejtori i shkollës apo mësuesit.
Kovaçi do të përballet tashmë me akuzën e “Përndjekjes” në Gjykatën e të Miturve.
Burimi: “BalkanWeb”
