A.H është vetëm katër vjeç dhe në dy muajt e fundit është rrahur dhe djegur në mënyrë barbare në dy kopështe të ndryshme shtetërore që administrohen nga Bashkia Tiranë. Sipas “exit.al”, me 29 gusht 2018, pasi u kthye në shtëpi nga kopështi Nr.1, vogëlushi refuzonte që e ëma ta lante dhe pas shumë insistimesh, ajo zbuloi shenjat e dhunës tek trupi i fëmijës. Pasi e dërgoi me urgjencë në komisariatin e policisë, ku policët i bënë pyetje të thjeshta, fëmija sërish nuk pranoi të fliste.
Të nesërmen, vogëlushin e intervistuan në prani të prindërve, policëve dhe tre psikologovë, ku më në fund rrëfeu plot frikë se ishte rrahur me shkop nga drejtoresha e kopështit Nashi Shehapi, më shumë se një herë. Shehapi i kishte urdhëruar A.H-së të mos tregonte asnjë fjalë në shtëpi, e vogëlushi ishte i trembur deri në pikën që dridhej kur dikush tentonte ta prekte. Ai zbuloi gjithashtu se, kur silleshin keq, fëmijët e kopështit mbylleshin rregullisht në “vrimën e miut” — “vrima e miut” ishte një dollap i errët nën një palë shkallë të kopështit.
Sipas matjeve të policisë, e nxira në krahun e djalit, ishte 7-10 centimetra e gjatë dhe 5-7 centimetra e gjërë dhe sipas mjekur ligjor ishte e pamundur që kjo lloj shenje të ishte shkaktuar nga një fëmijë tjetër, pasi forca e nevojshme për ta shkaktuar mund të vinte vetëm nga një i rritur.
Prindërit e A. H. ngritën padi kundër drejtoreshës së kopështit Nashi Shehapi, dhe menjëherë e larguan fëmijën e tyre nga Kopshti Nr. 1 , duke e regjistruar në një kopsht tjetër në Tiranë, sqaron “exit.al”.
Mirëpo ende ndaj shtetases Nashi Shehapi nuk është ndërmarrë asnjë veprim ligjor, pavarësisht raportit të psikologëve, pohimeve të fëmijës A. H., fotografive, raportit mjeko-ligjor dhe trysnisë së prindërve. Çështja u dërgua nga policia gjyqësore në prokurori një muaj e gjysmë më parë, por ajo ka mbetur në vend dhe Shehapi vijon punën e qetë si drejtoreshë e kopështit nr.1. Nga ana tjetër, Shehapi është gjithashtu kyetarja e organizatës së Partisë Socialiste në Kodrën e Priftit dhe përkrahëse shumë e zëshme e Partisë Socialiste.
Drejtuesja e Qendrës Ekonomike të Edukimit dhe Zhvillimit të Bashkisë Tiranë, Enkelejda Isaku, pranoi se ata janë informuar për situatën, por as Shehapi dhe asnjë pjesëtar tjetër i personelit të kopështit nuk është thirrur për pyetje nga prokuroria. Ndërkohë që prokurorja e çështjes Eriselda Bala, nuk është shfaqur asnjëherë e disponueshme për babain e djalit 4-vjeçar, kur ai ka kërkuar sqarime prej saj.
Por historia nuk mbaron këtu. Për fat të keq, bëhet edhe më keq.
Vogëlushi u tranferua në Kopështin Nr. 20, dhe çdo gjë dukej se po shkonte mirë deri më datën 8 tetor 2018, kur babai i fëmijës u lajmërua me telefon se fëmija i tij ishte djegur dhe ishte dërguar në spital. Djali i kishte shpëtuar vëmendjes së edukatores dhe kishte shkuar në kuzhinë, ku një pjesëtare e personelit po gatuante fasule. A. H. i kishte dalë përpara dhe ishte përplasur me të, ndërsa ajo po ecte duke mbajtur në duar tenxheren me fasulet e nxehta, e cila u derdh dhe fasulet ranë drejtpërdrejt mbi trupin e fëmijës. Lëngu ishte aq i nxehtë sa A. H. pësoi djegje të gradës së dytë në kraharor, që përveç dëmit fizik, me shumë gjasa, do t’i lërë pasoja psikologjike për gjithë jetën.
Të gjithë punonjësit e pranishëm kur ndodhi ngjarja shprehën pikëllimin dhe keqardhjen e tyre për atë çfarë ndodhi dhe prindërit e A. H-së e kuptuan se bëhej fjalë për një aksident. Dhe duhet ta theksojmë se ky incident mund të ishte shmangur nëse duhet të kishte më shumë personel për të mbikqyrur fëmijët, pasi një edukatore kujdeset për 20 deri në 25 fëmijë.
Këto dy incidente të tmerrshme për vogëlushin, ndodhën brenda dy muajsh, ku përveçse dëmeve fizike, kanë shkaktuar dhe dëme të mëdha emocionale.
A është vetëm A.H një viktimë e pakujdesisë dhe edukatorëve të dhunshmëm, apo ka edhe shumë e shumë fëmijë të tjerë? Çfarë tjetër që ne nuk dimë u ndodh fëmijëve në kopështet dhe shkollat e administruara nga Bashkia Tiranë? A mos kemi të bëjmë me një sistem që nuk funksionon dhe, për rrjedhojë, çështjeve serioze që kanë të bëjnë me mirëqënien e fëmijëve nuk u jepet rëndësia që duhet?
Burimi: Exit.al
