Një ngjarje mjaft e rëndë ka ndodhur mesnatën e së dielës në kryeqytet, ku viktimë mbeti një person i pafajshëm. Rreth orës 01:00, drejt ambienteve të Top Channel është qëlluar me armë zjarri në drejtim të godinës nga persona ende të paidentifikuar. Fatkeqësisht, roja i sigurisë, Pal Kola, i cili ishte në vendin e tij të punës duke u ngrohur pranë një ngrohëse që ka pasur brenda kabinës, u qëllua me breshëri plumbash, duke gjetur më pas vdekjen.
Paraprakisht, dyshohet se autor kanë qenë mbi tre persona, por ende asgjë nuk është e konfirmuar. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e 60-vjeçarit, duke i marrë jetën.
Pak orë pas krimit, në autostradën e Kavajës, tek vendi i quajtur “Përroi i Agait” është gjetur një mjet i djegur tip “Range Rover”, i cili dyshohet se u përket autorëve. Sipas informacioneve, targat e mjetit rezultojnë të vjedhura.
Policia ka sekuestruar pamjet e kamerave të sigurisë së objektit, por edhe të bizneseve në autostradë, për të zbuluar lëvizjet e autorëve. Që prej mesnatës, Policia ka ngritur pika kontrolli dhe vijon puna për identifikimin dhe kapjen e autorëve.
NJOFTIMI zyrtar i Policisë
Më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel. Si pasojë e të shtënave ka humbur jetën roja i sigurisë shtetasi P. K., 60 vjeç (punonjës i një shoqërie për ruajtjen fizike të objekteve).
Është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve. Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve.
