Një ngjarje e rëndë ka ndodhur në Kukës, ku dy vëllezër kanë përdhunuar një vajzë nga Kosova, me aftësi të kufizuara.
Në pranga u vunë vëllezërit Xh. H., 31 vjeç dhe M. H., 24 vjeç banues në fshatin Lojme të Kukësit, pasi dyshohet se kanë kryer marrëdhënie me shtetasen kosovare, duke përfituar nga pazotësia e saj fizike dhe mendore.
Burime për abcnews.al bëjnë të ditur se vajza ka rezultuar e humbur në Kosovë prej ditësh.
Pasi është gjetur në Kukës nga shërbimet e policisë, nën shoqërinë e psikologes ajo ka rrëfyer e traumatizuar edhe ngjarjen e abuzimit seksual.
“Arrestimi i tyre u bë pasi dyshohet se kanë kryer marrëdhënie seksuale me një shtetase kosovare, 20 vjeçe, duke përfituar nga pazotësia fizike dhe mendore e saj”, thuhet në njoftimin e policisë.
Materialet në ngarkim të shtetasve XH. H. dhe M. H. i kaluan Prokurorisë pranë Gjykatës së Shkallës së Parë Kukës, për veprën penale “Marrëdhënie seksuale ose homoseksuale me persona të pazotë për t’u mbrojtur”.
