Gjykata ka dhënë urdhër mbrojtjeje për bashkëshorten dhe djalin 16-vjeçar të deputetit Kujtim Gjuzi, pasi ky i fundit i ka dhunuar ata.
Vendimi i gjykatës është bërë publik nga “Shqiptarja.com”, sipas të cilës, kreu i Partisë Konservatore është urdhëruar t’i qëndrojë 200 metra larg bashkëshortes M., K., dhe djalit të tij, 16-vjeçar.
Ngjarja ka ndodhur në muajin nëntor 2019, ku gruaja, së bashku me djalin e saj, kanë kërkuar urdhër mbrojtje në gjykatën e Tiranës.
Sipas vendimit të bërë publik sot, Gjuzi duhet të shoqërohet nga policia për të tërhequr sendet personale nga apartamenti në pronësi të gruas.
Vendimi i gjykatës ka fuqi deri në nëntor të vitit 2020.
Kjo ngjarje e hidhur vjen në një kohë që deputeti Gjuzi, pritet të votojë paketën ligjore për ashpërsimin e dënimit për dhunuesit e grave.
