Një vajzë me kancer u martua me të dashurin e saj të shkollës së mesme në shtratin e spitalit, pasi i ishte thënë se i kishin mbetur vetëm pak ditë jetë.
28-vjeçarja Ronda Bivens, u martua me të dashurin e saj, Matthew Mager, 29 vjeç, javën e kaluar në një ceremoni prekëse në Tennessee të SHBA-ve.
Çifti, i cili ishte i lidhur prej 10 vitesh dhe kanë dy fëmijë bashkë, gjithmonë kishin menduar për një martesë të madhe.
Por jeta e tyre mori një kthesë të papritur 12 muaj më parë, kur Ronda u diagnostikua me një formë të rrallë kanceri, e njohur si “sarkoma epiteliale”, në kyçin e këmbës.
“I thash që ditën e parë kur zbuluam se ishte me kancer, se e “di që gjithmonë kemi planifikuar të kemi një dasmë gjigande”. I thash, “çfarëdo që të ndodh, ne do të martohemi në çdo mënyrë”, tha Matt për “Inside Edition”.
Si pjesë e trajtimit të saj, nënës së re iu pre këmba dhe iu nënshtrua kimioterapisë dhe rrezatimit. Por në atë kohë kanceri ishte përhapur në mushkëritë e Ronda-s dhe më pas në gjithë trupin e saj.
Pas më shumë se një viti duke luftuar me kancerin, shëndeti i Ronda-s u përkeqësua edhe më shumë javët e fundit. Kur mjekët i thanë se i kishin mbetur vetëm disa ditë jete, Matt përmbushi premtimin e tij për t’u martuar me të.
Pamje zemërthyese tregojnë Ronda-n të shtrirë në krevatin e saj me një fustan martese, ndërsa çifti shkëmbeu premtimet. Çifti fshiu lotët kur pastori u tha se martesa e tyre ishte e përjetshme.
“Qëllimi im ishte që t’i jepja mbiemrin tim para se të largohej nga jeta. Ishte vërtetë emocionuese. Unë bëj shaka me të dhe i them “nuk do të shkosh askund tani. Jemi të lidhur”. I kaloj shumicën e ditëve vetëm duke i mbajtur dorën dhe duke folur me të, sepse ndoshta nuk do të mund të flas me të nesër”, thotë Matt.
Burimi: Daily Mail
