Këngëtari i njohur shqiptar, Ermal Meta i cili po e zhvillon karrierën e tij artistike në Itali, së fundmi ka nisur një tur në qytete të ndryshme. Turi i tij quhet “Non abbiami armi” dhe ka rezultuar të jetë shumë i suksesshëm, por në të njëjtën kohë edhe shumë impenjativ për Ermalin.
Mirëpo ndërkohë që është duke shijuar sukseset e tij të njëpasnjëshme Ermalin ka filluar ta shqetësojnë disa akuza të fansave të tij, të cilët thonë se pas famës që ka fituar ai është bërë mendjemadh dhe ka ndryshuar shumë.
Ermali nuk e ka pranuar kurrsesi këtë gjë dhe nëpërmjet një “Live” në faqen e tij në Facebook u ka treguar atyre arsyet se pse nuk ka shumë kohë dhe mundësi për të folur drejtpërdrejtë me ta.
“Koncertet e përmasave të tilla janë shumë të lodhshme për artistët dhe sigurisht që ka net që janë shumë të ngarkuara. Nëse ndonjëherë nuk ndaloj të bëj foto apo t’ju përshëndes personalisht, nuk do të thotë se jam mendjemadh. Unë jam si të gjithë ju dhe dua që në skenë të jap maksimumin duke i kënaqur njerëzit që vijnë aty për mua. Unë i përgjigjem të gjithëve dhe sigurisht që ndonjëherë mundem dhe ndonjëherë jo, e kjo ka të bëjë me çështjet fizike. Nuk dua t’i jap rëndësi atyre që flasin fjalë të pavërteta, por dua t’i them atyre që më mbështesin që unë jam dhe do të jem gjithmonë për ju”, ka thënë Ermali.
