Ngjarja e rëndë që ka tronditur kryeqytetin mëngjesin e ditës së sotme, mësohet të jetë një krim pasioni, që la të pajetë dy të rinj. Xhaferr Mata 31 vjeç ekzekutoi me armë zjarri 19-vjeçaren Xhuljeta Çuni në zonën e “Don Boskos”, pasi dyshohet se dyshja sapo i kishte dhënë fund një lidhje dashurie.
Sipas “News 24”, Xhuljeta Çuni dhe Xhaferr Mata jetonin në Tiranë dhe sipas dëshmitarëve ata kanë pasur një debat mes tyre. 31 – vjeçari e ka vrarë vajzën në trotuar dhe më pas ka kaluar në anën tjetër të rrugës ku ka qëlluar veten me armë, në zonën e mbuluar me pemë.
Dëshmitarët në vendngjarje kanë rrëfyer për gazetën “Panorama” se djali ka qënë në gjendje të rënduar psikologjike dhe e priste 19 – vjeçaren në rrugë. Pasi ai i ka kërkuar asaj të ndalet, ajo i është kthyer duke i thënë “Mos më prek”.
Kjo duket se e ka acaruar Matën i cili e ka qëlluar Xhuljetën sapo ajo ka kthyer shpinën. Mësohet se kalimtarët kanë bërtitur pasi ai mbante armën drejt tyre duke thënë “ Nuk ju bëj gjë, mos kini frikë”.
Pas këtyre fjalëve ai ka vënë re se e reja ishte ende gjallë dhe e ka qëlluar për herë të dytë. Pastaj ai ka kaluar rrugën dhe qante me ngashërim, por pasi ka dëgjuar sirenën e policisë ka qëlluar veten. Mësohet se 31-vjeçari ka ndërruar jetë pak kohë më pas në spital dhe se ai banonte pikërisht në zonën ku kreu dhe krimin tronditës. Sakaq, policia ka shoqëruar një zonjë rreth të 40-ave e cila mësohet t’i ketë dhënë ndihmën e parë 19-vjeçares së ndjerë.
