Përdorimi i syzeve optike jo gjithmonë është zgjidhja më e mirë për ata persona që kanë probleme me shikimin. Në shumë raste mjekët okulistë rekomandojnë lentet e kontaktit për të korrigjuar problemet që shumë persona kanë me qartësinë e shikimit.
Përdorimi i tyre shoqërohet me një manual të posaçëm, i cili duhet të zbatohet me përpikmëri, në të kundërt syri kthehet në vatër infeksionesh dhe dëmtimesh të parikuperueshme.
Për të gjithë ata që në vend të syzeve optike kanë zgjedhur të përdorin lentet e kontaktit, ekzistojnë një e vërtetë e hidhur që jo të gjithë e dinë apo e marrin në konsideratë. Kjo ka të bëjë me faktin se përdorimi i gabuar i lenteve mund të shkaktojë infeksion në sy. Kështu mjekët këshillojnë pastrimin dhe dezinfektimin e mirë të duarve përpara se t’i prekni lentet.
Së dyti duhet të mos jeni grimuar përpara se të vendosni lentet.
Së treti, nuk duhet të laheni asnjëherë në pishina apo në det me lentet në sy.
Së fundmi, në qoftë se doni të flini pak pasdite duhet t’i hiqni lentet dhe t’i rivendosni kur të zgjoheni.
