“The heart wants what it wants” (Zemra do atë që do). Ky varg i këngës së Selena Gomez mund të shpjegojë më së miri situatën mes saj, The Weeknd dhe Justin Bieber.
Selena dhe Justin u kapën për herë të tretë bashkë, të diel teksa po hanin mëngjes në një restorant në Los Angeles, ndërkohë që i dashuri i Selenës, The Weeknd, ndodhej në turneun e tij muzikor.
Dhe në fakt ashtu siç e parandienim, Selena dhe The Weeknd i dhanë fund lidhjes pas 10 muajsh bashkë. Në fillim u raportua se këngëtari fshiu nga Instagrami të gjithë miqtë e Selenës, përfshi shoqen që i dhuroi asaj veshkën. Por dyshja ende e ndjekin njëri-tjetrin në Instagram.
Lajmi për ndarjen u dha të hënën në mëngjes nga revista “People” që pretendonte se të dy kishin pasur probleme për ‘muaj me radhë’ për shkak të orarit të punës dhe largësisë. Ndërsa ai ishte në turne, ajo filmonte një film të Woody Allen në Nju Jork.
“Ajo dhe Abel janë përpjekur për disa muaj në lidhje me marrëdhënien e tyre. Ka qenë e vështirë për të ndërkohë që Selena ndodhej për xhirime në Nju Jork. Kjo nuk ishte e lehtë për ta”, thotë një burim për “People”.
Ndoshta ka qenë shumë e vështirë që të shihje Gomezin duke u puthur me kolegun Timothée Chalamet teksa filmonin për filmin ” A rainy day in NY”. Më të vështira kanë qenë takimet e saj të njëpasnjëshme me ish-in, Justin Bieber.
Çifti e bënë publike lidhjen dhe që atëherë ata janë parë bashkë në Met Gala në maj dhe në eventin e Harper’s Bazaar Icons në NYC. Selena u pa për herë të fundit në koncertin e tij më 16 shtator në Filadelfia dhe që prej atëherë, ata kanë jetuar thuajse të ndarë. Epo, largësia ka qenë shpesh shkaku i ndarjes së shumë çifteve.
