Një burrë që përputhet me përshkrimin e Travis Decker, babai i zhdukur që dyshohet se ka vrarë tri vajzat e tij të mitura më shumë se një muaj më parë, raportohet se është parë në Idaho, ndërsa autoritetet vazhdojnë kërkimet intensive për të.
Sipas raportimeve të Fox 13 Seattle, një familje që po ndodhej në zonën Bear Creek në pyjet kombëtare Sawtooth National Forest më 5 korrik, pa një burrë që ngjante me Decker, sipas shërbimit të Marshalëve Amerikanë në Idaho.
Familja e përshkroi burrin si një mashkull të bardhë, rreth 1.73 – 1.78 m i gjatë, që mbante kapelë të zezë me rrjetë, vëthë të zinj të mëdhenj, një bluzë ngjyrë krem dhe pantallona të shkurtra të zeza, sipas KOMO News, një degë e rrjetit ABC.
Po ashtu, sipas burimeve lokale, ai kishte flokë të gjata të lidhura bisht, mjekër dhe mustaqe të parruar, dhe ishte veshur me këpucë Converse ose Vans low-top. Ai mbante gjithashtu një orë të zezë Garmin dhe një çantë shpine të zezë të markës JanSport.
Një zëdhënës i Marshalëve Amerikanë tha se burri nuk bëri kontakt me sy dhe nuk reagoi kur iu drejtuan me fjalë, një sjellje që ngre më tej dyshimet për identitetin e tij.
Ky zhvillim i fundit vjen pas tragjedisë së rëndë të ndodhur më 2 qershor, kur trupat e Paityn Decker (9 vjeç), Evelyn Decker (8 vjeç) dhe Olivia Decker (5 vjeç) u gjetën të pajetë pranë kampingut Rock Island në Chelan County, shteti i Uashingtonit. Vajzat kishin qenë në një vizitë të planifikuar me babain e tyre që prej 30 majit dhe nuk ishin parë më që prej asaj dite.
