Mbrëmjen e sotme në programin “Dua të të bëj të lumtur” u trajtua historia e një zotërie që quhej Agim, i cili prej kohësh kishte luajtur bixhoz dhe për shkak të tij kishte prishur marrëdhëniet edhe me bashkëshorten, Mirën, me të cilën ishte divorcuar para 6 vitesh.
Ai donte që t’i kërkonte falje publikisht asaj, mirëpo Mira nuk e falte dot, pasi siç pohoi ajo, Agimi me të cilin kishte katër fëmijë, e kishte nxjerrë nga shtëpia: “Unë nuk i besoj fjalëve të tij sepse ai nuk do të ndryshojë. Nuk është hera e parë që i thotë këto fjalë, por unë nuk dua që të flasë. Të gjitha gjërat mund t’ia falja, por vetëm kur më nxori nga shtëpia jo, se nuk kisha asnjë njeri!”
Ndërsa nga ana tjetër, Agimi u shpreh ndër të tjera: “Unë kam ardhur këtu se unë e ndiej që jam fajtor ndaj saj. Unë i kam shumë borxhe Mirës, por dua vetëm që të flasim me njëri-tjetrin, asgjë më shumë. Kanë kaluar katër muaj që nga llotoja e fundit që kam vendosur dhe jam betuar që nuk do të luaj më.” /top-channel
