Dikur imitonte këngëtaret e tjera, sot të gjithë i njohin këngët e saj. Miriam Cani, e cila zgjodhi Shqipërinë pas triumfit me grupin muzikor “Preluders” në Gjermani, është një ndër këngëtaret me interesante në tregun muzikor shqiptar.
Aftësitë e saj vokale, por edhe sharmi skenik, bënë që Miriam të zgjidhej një ndër fitueset e programit të talenteve të reja Popstar në Gjermani. Ajo ka jetuar mbi 14 vjet në Gjermani, ndërsa pas suksesit të korrur atje është rikthyer fuqishëm në Shqipëri me projekte të reja muzikore, pjesëmarrjen në edicionin e “The Voice” si një nga trajneret dhe sigurisht arritjet në jetën private, lidhja e saj me këngëtarin vlonjat Alban Skënderaj dhe lindja e një vajze.
Së fundi, partneri Alban Skënderaj i ka dedikuar një këngë të titulluar “Engjëll”. Vetë Miriami është personazh në këtë klip. Teksti, që është shkruar nga vetë Albani, është bashkim titujsh të këngëve që ka bërë më parë për të. Pavarësisht se sot njihet si “engjëlli” i Albanit, nga kënga më romantike e verës, jo gjithëkush e njeh historinë e saj.
Miriam ka lindur më 30.05.1985 në qytetin e Elbasanit. Së bashku me prindërit e saj ajo u largua drejt Gjermanisë në fillim të viteve ’90. Duke ndeshur vështirësi të shumta në kryerjen e profesionit, prindërit Agimi dhe Laureta u rikthyen në vendlindje pas 5 vitesh, ku qëndruan vetëm një vit.
Miriam ka punuar që në moshën 13-vjeçare, duke provuar punë nga më të ndryshmet mes të cilave edhe kamariere apo kujdestare fëmijësh. Por ëndrra e saj ka qenë gjithmonë kënga, kërcimi, vizatimi, dëgjimi i muzikës. Sigurisht që për këtë kishte mbështetjen e familjes së saj, prindërve dhe vëllait Silvi.
Motoja e saj “Qëndro gjithmonë vetvetja dhe mos harro kurrë se nga vjen”, ndoshta mbetet dhe shkaku i kthimit të saj në Shqipëri. Megjithatë një arsye tjetër edhe më e rëndësishmë është edhe lidhja me Albanin, me të cilin sot ajo ka një vajzë të bukur të quajtur Ameli.
*Shfleto galerinë
