Përshëndetje! Unë jam 27 vjeçe dhe para 6 muajsh u ndava nga i dashuri, me të cilin kisha një lidhje të gjatë. Kalova një periudhë mërzie pas ndarjes, por brenda 3-4 muajsh mu duk sikur e mblodha veten. Fillova të dilja si më parë dhe pak a shumë iu riktheva normalitetit. Mirëpo, muajin e fundit më duket sikur po më përsëritet gjendja që përjetova pas ndarjes. Mërzitem shpejt, nuk më zë gjumi dhe bëhem nervoze për gjërat më të vogla. Kur ndodhem në shtëpi, filloj të merrem me ndonjë punë, pastaj e le përgjysmë dhe nis një punë tjetër. E kam të vështirë të përqendrohem dhe ta çoj diçka deri në fund. Në punë, më ndodh e njëjta gjë. Mos nuk e kam kapërcyer plotësisht ndarjen dhe si mund të veproj për të fituar qetësinë e mëparshme?
Përshëndetje e dashur lexuese! E kuptoj që ke kaluar një periudhë të vështirë pas ndarjes, pasi për këdo, ndarja nga një person i dashur është një ngjarje e dhimbshme. Shqetësimet që ju keni shprehur janë treguese të një vështirësie psikologjike, që mesa duket, bëhet penguese për të kryer aktivitetet e jetës së përditshme, në shtëpi dhe në punë.
Nga njëra anë, ju ndiheni në ankth dhe nervozoheni për gjërat më të vogla. Nga ana tjetër, po përjetoni një mungesë dëshire për të kryer punët tuaja. Për t’i dhënë njëfarë kuptimi gjendjes suaj, duhen identifikuar arsyet pse shqetësimet po përsëriten dhe të vlerësohet sa ju pengojnë ato për të funksionuar në jetën e përditshme.
A keni provuar ndonjë mënyrë për t’i përballuar këto vështirësi dhe nëse po, a ka funksionuar? A i keni ndarë shqetësimet me dikë tjetër dhe a e keni marrë mbështetjen e nevojshme? Për të vlerësuar gjendjen me objektivitet, ju mund të konsultoheni me një specialist.
Ndihma në kohën dhe në mënyrën e duhur mund të jetë mjaft e dobishme për të përballuar vështirësitë që po përjetoni aktualisht, para se ato të përshkallëzohen
Lediona Braho, psikologe klinike
Për Iconstyle.al
