Një ngjarje e rëndë familjare me fund tragjik ka tronditur komunitetin shqiptar në Itali. Gentiana Hudhra, 45 vjeçe, u vra me thikë nga ish-bashkëshorti i saj, Nikollaq Hudhra, në një akt të dhunshëm që ndodhi në Passignano sul Trasimeno.
Djali i tyre, Mario, rrëfeu për mediat italiane momentet tronditëse para krimit. “Shkova të haja akullore me babin, pastaj ai vrau mamin,” tha ai, në një deklaratë që ka prekur mijëra njerëz.
Nikollaq Hudhra, 55 vjeç, u dorëzua menjëherë pas aktit, duke pritur i qetë karabinierët në një stol pranë vendit të ngjarjes. Në dëshminë e tij, ai pranoi se e kishte menduar vrasjen disa herë gjatë muajve të fundit dhe deklaroi se motivimi ishte “për të shpëtuar fëmijët”.
Krimi ndodhi në rrugë, teksa Gentiana po nisej për në punë. Autori përdori një thikë me teh 18 centimetra, ndërsa prokuroria ka vendosur ta akuzojë për vrasje të rënduar nga marrëdhënia familjare, paramendimi dhe egërsia e aktit.
Çifti kishte dy fëmijë të rritur, të cilët jetonin me të ëmën. Në ditët para ngjarjes nuk kishte asnjë shenjë që tregonte për një rrezik të menjëhershëm. Autoritetet pritet të konfirmojnë arrestimin dhe të zhvillojnë seancën paraprake gjyqësore.
