Një shpërthim i fuqishëm ka ndodhur në kryeqytetin libanez, Bejrut, ditën e djeshme ku raportohet se kanë ndërruar jetë mbi 100 persona, janë lënduar më shumë se 4 mijë të tjerë dhe rreth 300,000 libanezë kanë mbetur të pastrehë.
Një prej të mbijetuarave është edhe Chadia Elmeouchi-Noum, e cila ka rrëfyer tmerrin që kaloi pas shpërthimit që ndodhi në portin detar. Ajo tregon se vraponte nëpër xhama për të shpëtuar burrin e saj, Anthony, i cili pas shpërthimit kishte mbetur nën gërmadha.
“Kishte xhama kudo, por nuk më interesonin dhimbjet e shkaktuara, për mua e rëndësishme ishte të shpëtoja burrin. E gjeta mes rrënojave. Ai nuk reagonte, kishte gjak kudo. Burri kishte një pjesë të dritares mbi kokë dhe një pjesë të murit mbi kokë. I rridhte gjak nga koka. Unë u përpoqa që të ndaloja gjakderdhjen, por ishte e kotë. Kërkova ndihmë, por askush nuk arriti të më dëgjonte.”- është shprehur Chadia për BBC.
Më tej ajo ka thënë se një i huaj i ofroi ndihmë dhe me makinën e tij e dërgoi bashkëshortin e saj për në spital.
“Rrugët ishin të shkreta. Kishte njerëz kudo. Ne e dërguam në spital Anthonyn dhe disa minuta më vonë ata e futën në dhomën e urgjencës e nuk na lejuan që të futeshim brenda. Ata u përpoqën që të largohesha, por unë u fsheha në një dollap. Nuk doja të shkoja, doja të sigurohesha që ai ishte mirë. Tani është operuar në tru dhe jam duke pritur jashtë dhomës ku është.”- përfundoi Chadia.
Ndërkohë autoritetet vendase këtë të mërkurë e kanë shpallur ditë zie kombëtare, për shkak të numrit të madh të viktimave dhe të të lënduarëve.
