Aktorja e njohur meksikane, Margarita Isabel, është ndarë nga jeta në moshën 75-vjeçare të dielën, pasi vuante prej kohësh nga një sëmundje e rëndë.
Nëna e aktorit Mario Iván Martínez vuante nga komplikacionet në rrugët e frymëmarrjes dhe emfizema ishte shkaktarja që i përkeqësoi gjendjen shëndetësore. Pas shtrimit në spitalin qendror në Cuernavaca, Morelos, gjendja e Isabel u rëndua.
Një nga emrat më të njohur dhe më të vlerësuar në kinematografinë latine, e cilësuar si ‘Aktorja e parë’ numëron me dhjetëra role në serialet e suksesshme latine.
Dekadën e fundit ajo është larguar nga televizioni, pasi shëndeti i saj filloi të përkeqësohej.
Margarita Isabel lindi në Meksikë më 25 korrik, 1943. Karrierën artistike e nisi në fund të viteve ’60. Afro një dekadë më parë u tërhoq nga projektet për shkak të problemeve me shëndetin. Për 10 vjet Isabel ishte e dashura e aktorit Armando Palomo.
Në Shqipëri janë transmetuar shumë seriale të luajtura prej saj, një ndër më të spikaturit ai i Karmelës te “Njerka”.
