Tayna edhe pse ka vetëm 3 muaj që është bërë pjesë e tregut muzikor shqiptar ndiqet nga një numër i madh fansash në rrjetet sociale. Mirëpo ajo ka tërhequr vëmendjen edhe me tekset e këngëve të saj, të cilat po flitet se janë diss-e për koleget e saj, veçanërisht për Rinën dhe Fifin.
Mirëpo në një intervistë për “Prive”, Tayna ka rrëfyer se kënga e saj “Fake” nuk është një diss për këto këngëtare.
“Nuk ka të bëj me asnjë vajzë, kënga ‘Fake’, është komplet për djemtë. Kur e kam nxjerrë e kam bërë për një arsye. S’bëj asgjë pa arsye.
Duke parë që ka shumë femra që këndojnë në këtë zhanër, prej pak kohësh konkurrenca e meshkujve jam unë dhe të tjera si unë. Doja që djemtë të ndihenshin pak të kërcënuar, të xhelozonin pak, por askush s’e ka shfaqur haptazi”, tha Tayna në këtë intervistë.
Reperja e re tha ndër të tjera në këtë intervistë se suksesin e saj apo të artistëve të tjerë është vetëm publiku ai që mund ta vlerësojë.
“Puna jonë e vetme si artistë është të publikojmë muzikë, të argëtojmë publikun, të tregojmë talentin tonë. Publiku vendos kush është më i mirë, kush është i pari, kush është i suksesshëm dhe kë do të ndjekë”, tha ndër të tjera Tayna.
