Aplikacioni francez, i cili është i disponueshëm për telefonat iPhone dhe Android, u dërgon njoftim përdoruesve një herë në 24 orë për të shkrepur një foto duke përdorur kamerat e përparme dhe të pasme të smartfonit të tyre.
BeReal, rrjeti social që po përhapet masivisht ka ngjalllur interes dhe kuriozitet pikërisht prej origjinalitetit të tij. Aplikacioni më i ri për shpërndarjen e fotografive nuk është si platformat e tjera të mediave sociale. Kjo pasi rrjeti më i ri social në botë ndalon kategorikisht postimin e fotove të edituara. Përdoruesit e tij aktivë janë rritur vrullshëm këtë vit me më shumë se 315%, sipas të dhënave nga Apptopia, e cila gjurmon dhe analizon performancën.
BeReal është një aplikacion i mediave sociale që inkurajon përdoruesit të ndajnë një pjesë të jetës së tyre në kohë reale. Ai u lançua në fillim të vitit 2020 nga një sipërmarrës në Francë, por shumica e përdoruesve të tij – të paktën 65% – janë regjistruar këtë vit.
Siç sugjeron edhe emri i tij, fokusi është tek origjinaliteti. Përdoruesit ftohen një herë në ditë që të ndajnë një foto të asaj që po bëjnë në atë moment, duke u dhënë miqve dhe të tjerëve një pamje të paedituar të jetës së tyre.
BeReal dëshiron që përdoruesit të portretizojnë jetën e tyre në vend që të ndajnë imazhe për të fituar ndikim, tha një zëdhënës i BeReal.
“Ne duam t’i bëjmë njerëzit të ndihen mirë me veten dhe jetën e tyre.”
