Një 50-vjeçare me aftësi të kufizuar është bërë nënë në maternitetin “Koço Gliozheni” në Tiranë, pasi kaloi shtatzëninë në spital për shkak të vështirësisë të madhe që kishte për ta përballuar e vetme, duke qenë se nuk mund të ecë.
Ministrja e Shëndetësisë dhe Mbrojtjes Sociale, Ogerta Manastirliu, ka vizituar sot Zenepen në spital pas lindjes së vajzës dhe ka përcjellë rastin në profilin e saj në Facebook.
Në Gusht të vitit 2018, bashkëshorti i 50-vjeçares Gëzimi i është drejtuar me një email Ministres Manastirliu për ta mbështetur për qëndrimin në spital, për vijimin e shtatzënisë së gruas së tij.
“Përshëndetje znj. Ogerta. Unë jam Gëzimi, bashkëshorti i Zenepes. Të dy si çift jemi me aftësi të kufizuar (karrige me rrota) dhe së bashku jemi takuar në ambientet e punishtes Mirësia, ku ju keni shpërndarë karrige me rrota. Por sot po ju drejtohem personalisht për një arsye shumë më madhore. Bashkëshortja ime Zenepja është shtatzënë dhe jemi shumë të lumtur për këtë mrekulli. Por do tju lutesha të na ndihmonit që shtatëzaninë Zenepja ta kalojë në spital për shkak të vështirësisë së madhe që paraqet rasti ynë”.
Gjatë kësaj kohe ata kanë ndjekur biznesin e tyre familjar (një kopsht për fëmijë) nga dhoma e maternitetit nëpërmjet sistemit të kamerave. Shtatzania nuk ka qenë e lehtë por është finalizuar me sukses.
Dje ka ardhur në jetë El’Ana që gëzon shëndet të plotë bashkë me nënën e saj. Prindërit shprehen se e kanë quajtur El’Ana (Zoti na u përgjigj) dhe falenderojnë Ministren dhe stafin e përkushtuar të maternitetit për ndjekjen dhe kujdesin gjatë kësaj shtatzënie të pazakontë.
