Për pak kohë pandemia e koronavirusit na “zuri sytë dhe mendjen” dhe harruam se Shqipëria është një vend me rekorde negative për sa i takon vdekshmërisë nga kanceri.
Është pikërisht kjo sëmundje e para në listën e atyre “armiqve të padukshëm” që çdo ditë u merr jetën dhe po pakëson shqiptarët.
Tetori është edhe muaji i luftës kundër kancerit të gjirit, por duket se këtë vit është bërë fare pak ose asgjë në lidhje me sensibilizimin apo ofrimin e analizave falas për gratë dhe vajzat.
Sipas të dhënave më të fundit, numri i grave me kancer të gjirit në vendin tonë është rritur edhe më shumë.
Mjekët onkologë shprehen të shqetësuar pasi tanimë po haset tek vajzat e reja nën 30 vjeç. Janë të paktën 700 -800 raste të reja në vit ato që ekzaminohen nëpër spitalet tona.
Mjekët japin alarmin, sepse sipas tyre, sot gjen shumë vajza të reja që konsumojnë duhan e alkool, pa e ditur që janë ndër faktorët që shkaktojnë kancer.
Por situata me Covid-19 ka ndikuar gjithashtu negativisht tek pacientët me kancer gjiri. Ndonëse janë konsultuar dhe monitoruar online disa prej tyre, nga frika mos të bien në kontakt me virusin, nuk janë paraqitur nëpër spitale për terapitë e nevojshme.
Por kjo gjë sipas mjekëve ka sjellë përkeqësim të situatës së tyre shëndetësore, pasi në shumë raste sëmundja ka avancuar dhe shëndeti i tyre është përkeqësuar, pasi metastazat u janë përhapur në organe të tjera.
Kjo ka sjellë sipas mjekëve, edhe raste fatale të humbjes së jetëve.
Radhët e onkologjiku
Në një kohë kur shumë sëmundjeve të tjera ju bart edhe koronavirusi, kanë qenë të shumtë ata qytetarë shqiptarë që për shkak të saj kanë humbur jetë, por që më parë kanë pasur edhe sëmundje bashkëshoqëruese.
Numrin e lartë të të sëmurëve me epikriza të ndryshme e tregojnë edhe pavionet e spitaleve të mbushur plot si në Tiranë ashtu edhe në rrethe.
Por më e dukshme kjo është tek spitali Onkologjik në Tiranës, ku vetëm pak metra larg Infektivit, qytetarët presin në radhë për të marrë mjekimet e nevojshme me citostatikë për kancerin.
Në shumë raste të lodhur nga sëmundja dhe hallet ata nuk ruajnë as distancën dhe për më tepër shumë prej tyre qëndrojnë pa maska mbrojtëse.
Por ajo që është më shqetësuese është fakti se në disa raste në QSUT kanë munguar për ta edhe mjekimet bazë të kimioterapive, pasi nga ana e Ministrisë së Shëndetësisë nuk ishin zhvilluar ende tenderat.
/GazetaReforma.com/
